Basir Sultan Kazmi
jab se ham rakhne lage hain kaam apne kaam se
vo udhar aram se hain ham idhar aram se
ye bhi kaT ja.egi jo thoḌi bahut baaqi hai umr
ham yahi karte rahenge kaam apne aam se
is dar-e-insaf ke darban bhi hain munsif bahut
ham junhi fariyad se baaz aa.e vo dushnam se
ashiqi men lutf to saara tajassus ki hai den
kar diya aghaz men kyon ashna anjam se
ḳhaak se banti hai jaise ḳhisht ham kuchh is tarah
dekh kya sona banate hain ḳhayal-e-ḳham se
is tarah mil jaa.e shayad baryabi ka sharaf
mashvara hai ab ke arzi bhej farzi naam se
ya to vo tasvir hai pesh-e-nazar ya kuchh nahin
haath dho didon se ‘basir’ ye ga.e ab kaam se
Leave a Reply