nindon ko jab ḳhvab men juuta jaata tha
main bas apne nain bhigota jaata tha
anchal ka ik phuul shararat karta tha
ik shahzada patthar hota jaata tha
phuul dua-e-nur sunate the aur main
us ki ḳhatir haar pirota jaata tha
ishq men ham ne jitne rang apna.e the
vahshi dhobi sab ko dhota jaata tha
paani bharne ek kuen par jaati thi
us ka paani miTha hota jaata tha
meri halat itni abtar ho ga.i kya
kahte hain kal vo bhi rota jaata tha
main ‘mumtaz’ gulabon jaisa hone ko
us ki ḳhushbu dil men bota jaata tha
Leave a Reply