Adhuri Nazm

Abbas Tabish

andheri shaam ke sathi

adhuri nazm se zor-azma hain

bar-sar-e-kaghaz bichhadne ki

suno… tum se dil-e-mahzun ki baten kahne valon ka

yahi anjam hota hai

kahin satr-e-shikasta ki tarah hain chaar shane chit

kahin harf-e-tamanna ki tarah dil men tarazu hain

suno… in nil-chashmon sakht-janon be-zabanon par

jo guzregi so guzregi

magar main ik adhuri nazm ki haijan men khoya

tumhen avaz deta huun

ki tanha aadmi takhliq se aari hua karta hai

jan-e-man!

suno… mere qarib aao

ki mujh ko aaj ki raat ik adhuri nazm puuri kar ke sona hai!