kare ashiq pe vo bedad jitna us ka ji chahe
rakhe dil ko mire nashad jitna us ka ji chahe
hamen bhi sabr khatir-khvah dad-e-haq hai ulfat men
vo de jaur o jafa ki daad jitna us ka ji chahe
ye mazlum-e-mohabbat dad-ras hargiz na pavega
kare dil-dad aur fariyad jitna us ka ji chahe
adam hai aur vajud us musht-e-par ka bhi masavi sa
sitam ham par kare sayyad jitna us ka ji chahe
bala-e-na-gahan girya giraftari nahin ghafil
vo ho gham se mire azad jitna us ka ji chahe
nahin hai sarnavisht us ki lab-e-jan-bakhsh-shirin ki
kare jan-kandani farhad jitna us ka ji chahe
hamen ‘hasrat’ faramoshi bhi us ki yadgari hai
kare go ham ko kam-tar yaad jitna us ka ji chahe
Leave a Reply