ain mumkin hai miri baat zara si nikle
koi tasvir mire dil se tumhari nikle
aaj angan men tire hijr ka suraj nikla
aaj mumkin hai mire zaḳhm se kirchi nikle
us ne is shart pe rone ki ijazat di hai
aah nikle na labon se koi siski nikle
jan-kani vo ki farishte bhi panahen mange
aap aa.en to miri aḳhiri hichki nikle
aise nikla hai mire baḳht ka taara dekho
haath se TuuT ke beva ke jyuun chuḌi nikle
koi aa.e mire jiine ka sahara ban kar
shaḳh se phuuT ke konpal koi aisi nikle
aaj phir dil men tire diid ki hasrat jaagi
kaash phir kaam koi tujh se zaruri nikle
Leave a Reply