Masti-E-Rindana Hum Sairabi-E-Mai-Khana Hum

masti-e-rindana ham sairabi-e-mai-khana ham

gardish-e-taqdir se hain gardish-e-paimana ham

khun-e-dil se chashm-e-tar tak chashm-e-tar se ta-ba-khak

kar gae akhir gul-o-gulzar har virana ham

kya bala jabr-e-asiri hai ki azadi men bhi

dosh par apne liye phirte hain zindan-khana ham

raah men faujon ke pahre sar pe talvaron ki chhanv

aae hain zindan men bhi ba-shaukat-e-shahana ham

mitte mitte de gae ham zindagi ko rang-o-nur

rafta rafta ban gae is ahd ka afsana ham

ya jaga dete hain zarron ke dilon men mai-kade

ya bana lete hain mehr-o-mah ko paimana ham

qaid ho kar aur bhi zindan men udta hai khayal

raqs zanjiron men bhi karte hain azadana ham