jo shaḳhs raah banata raha daraḳhton men
usi ko chhoḌ gaya rasta daraḳhton men
uchhal paḌa tha jab ik baar jhiil ka paani
badan chhupati phiri thi hava daraḳhton men
nikal to aa.i kiran aarzu ke jangal se
ulajh ke rah ga.i lekin qaba daraḳhton men
zamane bhar ki tamazat se tha sukun lekin
ajiib ḳhauf ka ehsas tha daraḳhton men
kahin charagh kahin a.ina kahin ḳhushbu
ravan hai koi ajab qafila daraḳhton men
Leave a Reply