Rais Amrohvi
kahin se saz-e-shikasta ki phir sada aa.i
bahut dinon men ik avaz ashna aa.i
chali kuchh aaj is andaz se nasim-e-sahar
ki baar baar kisi ki sada-e-pa aa.i
tumhari tal.at-e-zeba ko kar liya sajda
nazar jahan bhi koi shakl-e-dilruba aa.i
ajiib lutf hua un ki yaad se mahsus
ki jaise dil ke dariche khule hava aa.i
rah-e-hayat men kanTe bikherne vale!
hayat bhi tire dar tak barhana-pa aa.i
chaman se pahle to ik sail-e-atishin guzra
phir us ke ba.ad barasti hui ghaTa aa.i
shuru-e-ishq men un se hi kuchh hijab na tha
kabhi kabhi to ḳhud apne se bhi haya aa.i
ham apne hal-e-pareshan pe barha ro.e
aur us ke ba.ad hansi ham ko barha aa.i
kabhi qarib se chheḌa jo saz-e-jan ko ‘ra.is’
to gosh-e-dil men bahut duur ki sada aa.i
Leave a Reply