Tu Bhali Baat Se Hi Meri Khafa Hota Hai

tu bhali baat se hi meri ḳhafa hota hai

aah kya chahna aisa hi bura hota hai

tere abru se mira dil na chhutega hargiz

gosht naḳhun se bhala koi juda hota hai

main samajhta huun tujhe ḳhuub tarah ai ayyar

tere is makr ke iḳhlas se kya hota hai

hai kaf-e-ḳhak miri bas-ki tab-e-ishq se garm

paanv vaan jis ka pade abla-pa hota hai

dil mira haath se jaata hai karun kya tadbir

yaar muddat ka mira haae juda hota hai

rahbar manzil-e-maqsud ko darkar nahin

shauq-e-dil apna hi yaan rah-numa hota hai

ghair harjai mira yaar liye jaata hai

mujh pe ‘taban’ ye sitam aaj bada hota hai

Leave a Comment