ye jhuuT hai ki bichhaḌne ka us ko gham bhi nahin
vo ro raha hai magar us ki aankh nam bhi nahin
ye baat sach hai ki vo zindagi nahin meri
magar vo mere liye zindagi se kam bhi nahin
tujhe pata hi nahin meri raah kaisi hai
tu chal sakega mire saath do qadam bhi nahin
ye kya ki lagta hai ab sab ko ḳhali ḳhali sa
mire alava koi chiiz ghar men kam bhi nahin
main tujh se jhuk ke mila huun magar ye dhyan rahe
baḌa nahin huun magar tujh se qad men kam bhi nahin
shanaḳht us ki alag hai mira vajud alag
juda bhi mujh se nahin hai vo mujh men zam bhi nahin
Leave a Reply