Jo Tu Mera Muqaddar Bante Bante Rah Gaya Hai

jo tū merā muqaddar bante bante rah gayā hai

samajh le, kuchh kahīñ par bante bante rah gayā hai

ye dil ke zaḳhm to vaise ke vaise hī hare haiñ

ki terā lams mantar bante bante rah gayā hai

maiñ terī dūrī-o-qurbat se aage aa ga.ī huuñ

so terā naqsh dil par bante bante rah gayā hai

ajab hī kyā hai jo mujh ko nahīñ tū mil sakā to

mirā har kaam aksar bante bante rah gayā hai

kahānī ibtidā hī se bahut uljhī huī thī

sabhī kuchh is meñ behtar bante bante rah gayā hai

Leave a Comment