Laghzishon Se Mawara Tu Bhi Nahin Main Bhi Nahin

laghzishon se mavara tu bhi nahin main bhi nahin

donon insan hain ḳhuda tu bhi nahin main bhi nahin

tu mujhe aur main tujhe ilzam deta huun magar

apne andar jhankta tu bhi nahin main bhi nahin

maslahat ne kar diya donon men paida iḳhtilaf

varna fitrat ka bura tu bhi nahin main bhi nahin

chahte donon bahut ik dusre ko hain magar

ye haqiqat manta tu bhi nahin main bhi nahin

jurm ki nauiyyaton men kuchh tafavut ho to ho

dar-haqiqat parsa tu bhi nahin main bhi nahin

raat bhi viran fasil-e-shahr bhi TuuTi hui

aur sitam ye jagta tu bhi nahin main bhi nahin

jan-e-‘arif’ tu bhi ziddi tha ana mujh men bhi thi

donon ḳhud-sar the jhuka tu bhi nahin main bhi nahin