dard-o-gham-e-hayat ka darman chala gaya
vo khizr-e-asr-o-isa-e-dauran chala gaya
hindu chala gaya na musalman chala gaya
insan ki justuju men ik insan chala gaya
raqsan chala gaya na ghazal-khvan chala gaya
soz-o-gudaz o dard men ghaltan chala gaya
barham hai zulf-e-kufr to iman sar-nigun
vo fakhr-e-kufr o nazish-e-iman chala gaya
bimar zindagi ki kare kaun dil-dahi
nabbaz o charasaz-e-marizan chala gaya
kis ki nazar padegi ab ”isyan” pe lutf ki
vo mahram-e-nazakat-e-isyan chala gaya
vo raz-dar-er-mahfil-e-yaran nahin raha
vo gham-gusar-e-bazm-e-arifan chala gaya
ab kafiri men rasm-o-rah-e-dilbari nahin
iman ki baat ye hai ki iman chala gaya
ik be-khud-e-surur-e-dil-o-jan nahin raha
ik ashiq-e-sadaqat-e-pinhan chala gaya
ba-chashm-e-nam hai aaj zulekha-e-kaenat
zindan-shikan vo yusuf-e-zindan chala gaya
ai aarzu vo chashma-e-haivan na kar talash
zulmat se vo chashma-e-haivan chala gaya
ab sang-o-khisht o khaak o khazaf sar-buland hain
taj-e-vatan ka laal-e-darakhshan chala gaya
ab ahrman ke haath men hai tegh-e-khun-chakan
khush hai ki dast-o-bazu-e-yazdan chala gaya
dev-e-badi se mark-e-sakht hi sahi
ye to nahin ki zor-e-javanan chala gaya
kya ahl-e-dil men jazba-e-ghairat nahin raha
kya azm-e-sar-faroshi-e-mardan chala gaya
kya baghiyon ki atish-e-dil sard ho gai
kya sarkashon ka jazba-e-pinhan chala gaya
kya vo junun-o-jazba-e-bedar mar gaya
kya vo shabab-e-hashr-badaman chala gaya
khush hai badi jo daam ye neki pe daal ke
rakh denge ham badi ka kaleja nikal ke
Leave a Reply