Jab Diya KHamosh Tha Aur Raushni Hoti Na Thi

jab diyā ḳhāmosh thā aur raushnī hotī na thī

raat kyā aatī thī goyā zindagī hotī na thī

jin dinoñ logoñ kī āñkheñ ḳhvāhishoñ se duur thiiñ

un dinoñ is shahr kī ye dilkashī hotī na thī

apnī apnī raġhbatoñ par jab talak thā iḳhtiyār

tere mere darmiyāñ ye bebasī hotī na thī

un dinoñ kī baat hai jab ham the miTTī se juḌe

be-kalī ma.adūm thī aur be-dilī hotī na thī

dekhte hī dekhte manzar badal kar rah gayā

ye galī suunī thī jab tak aap kī hotī na thī

apne apne din the sab ke apnī apnī raat thī

koī bhī shai jab nazar meñ markazī hotī na thī

jab dar-o-dīvār aa.e to uThī dīvār bhī

ghar nahīñ thā to hamārī be-gharī hotī na thī

ishq ne jab tak junūñ kā rāsta dekhā na thā

zindagī be-kaif thī tīsha-garī hotī na thī

is zamīñ kā ḳhālī-pan thā aur havā kā shor thā

un dinoñ kī baat hai jab shā.irī hotī na thī

jis kī shādābī hameñ le aa.ī hai ‘shāhid’ yahāñ

us jazīre par kabhī kyā zindagī hotī na thī

Leave a Comment