jab diya ḳhamosh tha aur raushni hoti na thi
raat kya aati thi goya zindagi hoti na thi
jin dinon logon ki ankhen ḳhvahishon se duur thiin
un dinon is shahr ki ye dilkashi hoti na thi
apni apni raghbaton par jab talak tha iḳhtiyar
tere mere darmiyan ye bebasi hoti na thi
un dinon ki baat hai jab ham the miTTi se juḌe
be-kali ma.adum thi aur be-dili hoti na thi
dekhte hi dekhte manzar badal kar rah gaya
ye gali suuni thi jab tak aap ki hoti na thi
apne apne din the sab ke apni apni raat thi
koi bhi shai jab nazar men markazi hoti na thi
jab dar-o-divar aa.e to uThi divar bhi
ghar nahin tha to hamari be-ghari hoti na thi
ishq ne jab tak junun ka rasta dekha na tha
zindagi be-kaif thi tisha-gari hoti na thi
is zamin ka ḳhali-pan tha aur hava ka shor tha
un dinon ki baat hai jab sha.iri hoti na thi
jis ki shadabi hamen le aa.i hai ‘shahid’ yahan
us jazire par kabhi kya zindagi hoti na thi
Leave a Reply