tum dil ki dil men rakkho bataya nahin karo
yuun kah ke dastan rulaya nahin karo
mujh se bichhaḌ ke rahta hai dil-shad ek shaḳhs
ye man-ghaḌat kahani sunaya nahin karo
ankhon ke gird halqe paḌe jaag jaag kar
nindon ko meri aise uḌaya nahin karo
meri ghazal ka tuul tumhare sabab se hai
tum soch ban ke sher men aaya nahin karo
taare shumar karti huun shab bhar firaq men
tum duur mujh se jaan miri jaaya nahin karo
mazlum ki sada se na aa jaa.e inqalab
itna ziyada zulm bhi Dhaya nahin karo
koshish karo ‘sabila’ ke sab tum se ḳhush rahen
nahaq kisi ke dil ko dukhaya nahin karo
Leave a Reply