Zeb Ghauri
ghaar ke munh se ye chaTTan haTane ke liye
koi neki bhi nahin yaad dilane ke liye
ik nigah-e-ghalat-andaz ka imkan nikla
kuchh zamin aur mili paanv baḌhane ke liye
us ki rahon men paḌa main bhi huun kab se lekin
bhuul jaata huun use yaad dilane ke liye
sub.h darveshon ne phir raah li apni apni
main bhi baiTha tha vahan qissa sunane ke liye
vo mire saath to kuchh duur chala tha lekin
kho gaya ḳhud bhi mujhe raah pe laane ke liye
ek shab hi to basar karna hai is dasht men ‘zeb’
kuchh bhi mil jaa.e yahan sar ko chhupane ke liye
Leave a Reply