kya zaruri hai ab ye batana mira
TuTti shaḳh par tha Thikana mira
gham nahin ab mili hain jo tanha.iyan
anjuman anjuman tha fasana mira
jo bhi aaya hadaf par vo kab bach saka
cukta hi nahin tha nishana mira
ik zamana kabhi tha mira ham-nava
tum ne dekha kahan vo zamana mira
arz-e-bhopal se tha ta.alluq kabhi
ab to sab kuchh hai ye laḌkana mira
na-tavani pe meri jo hain ḳhanda-zan
in ko album purana dikhana mira
mere jaane se behtar hai ‘mohsin’ kabhi
bazm-e-sher-o-suḳhan men na jaana mira
Leave a Reply