Akhtar Ul Iman
hasab-nasab hai na tarikh o ja-e-paidaish
kahan se aaya tha mazhab na valdiyat maalum
maqami chhote se khairati aspatal men vo
kahin se laaya gaya tha vahan ye hai marqum
mariz raton ko chillata hai ”mire andar
asiir zakhmi parinda hai ik, nikalo ise
gulu-girafta hai ye habs-e-dam hai khaif hai
sitam-rasida hai mazlum hai bacha lo ise”
mariz chikhta hai dard se karahta hai
ye vietnam, kabhi dominican, kabhi kashmir
zar-e-kasir, siyah qaumen, khaam madniyat
kasif tel ke chashme, avam, istehsal
zamin ki maut bahaim, fizai jang, sitam
ijara-dari, subuk gaam, dilruba, atfal
sarod-o-naghma, adab, sher, amn, barbadi
janaza ishq kaa, daf ki sadaen, murda khayal
taraqqi, ilm ke gahvare, ruuh ka madfan
khuda ka qatl, ayaan zer-e-naf zohra jamal
tamam raat ye be-rabt baten karta hai
mariz sakht pareshani ka sabab hai yahan
gharaz ki jo tha shikayat ka ek daftar tha
natija ye hai usi roz muntaqil karke
use ik aur shifa-khane ko ravana kiya
suna gaya hai vahan nafsiyat ke mahir
tabib haziq o nabbaz doctor kitne
talab kiye gae aur sab ne ittifaq kiya
ye koi zehni maraz hai, mariz ne shayad
kabhi parinda koi paala hoga lekin vo
adam-e-tavajjohi ya ittifaq se yunhi
bichara mar gaya us maut ka asar hai ye
ajiib chiiz hai taht-e-shuur insan ka
ye aur kuchh nahin ehsas-e-jurm hai jis ne
dil o dimagh pe qabza kiya hai is darja
mariz qatil o mujrim samajhta hai khud ko!
kisi ki raae thi pasmanda qaum ka ik fard
mariz hoga isi vaste siyah qaumen
gharib ke liye ik tabō ban gaiin afsos
koi ye kahta tha ye asal men hai hubb-e-vatan
mariz chahta tha ham kafil hon apne
kisi bhi qaum ke aage na haath phailaen
yahin pe tel ke chashme hain, vo karen daryaft!
guman kuchh ko tha ye shakhs koi shaer hai
jo chahta tha jahan-gardi men guzare vaqt
hasin aurten maail hon lutf-o-aish rahe
qalam ke zor se shohrat mile zamane men
zar-e-kasir bhi haath aae is bahane se
magar gharib ki sab koshishen gaiin nakam
shikast-e-paiham o ehsas-e-na-rasai ne
ye haal kar diya majruh hogae aasab
gharaz ki nukta-rassi men guzar gaya sab vaqt
vo chikhta hi raha dard ki dava na mili
nashist baad nashist aur muaene shab o roz
inhin men vaqt guzarta gaya shifa na mili
phir ek shaam vahan surma-dar-gulu aai
jo us ke vaste goya tabib-e-haziq thi
kisi ne phir na suni dard se bhari avaz
karahta tha jo khamosh ho gaya vo saaz
baras guzar gae is vaqie ko, maazi ki
andheri god ne kab ka chhipa liya us ko
magar suna hai shifa-khane ke dar-o-divar
vo gird-o-pesh jahan se kabhi vo guzra tha
kharabe bastiyan jangal, ujaad rah-guzar
usi ki chikh ko dohrae ja rahe hain abhi
”koi mudava karo zalimo mire andar
asiir zakhmi parinda hai ik nikalo ise
gulu-girafta hai ye habs-e-dam hai khaif hai
sitam-rasida hai mazlum hai bacha lo ise”
Leave a Reply