Shahida Hasan
lams aahat ke havaon ke nishan kuchh bhi nahin
khvab hi khvab hai ye shahr yahan kuchh bhi nahin
koi guzri hui shamon men kabhi chamka tha
is ghani shab ke andhere men ayaan kuchh bhi nahin
chand saaat ke sitare hain sar-e-bam tulu
din utar jaaen to phir ghar ka saman kuchh bhi nahin
ik khamoshi hai liye hairat-e-sad-naqsh-o-nigar
varna badle hue mausam ki zaban kuchh bhi nahin
asman aaj tiri chhanv men aa baithi main
ab mire sar pe tira koh-e-giran kuchh bhi nahin
Leave a Reply