gulzar men ye kahti hai bulbul gul-e-tar se
dekhe koi ma.ashuq ko ashiq ki nazar se
lo aur suno kahte hain vo ham se bigaḌ kar
dekho hamen dekho na mohabbat ki nazar se
vo uTThi vo aa.i vo ghaTa chha ga.i saaqi
mai-ḳhane pe allah kare TuuT ke barse
mai-ḳhane pe ghanghor ghaTa chha.i hai be-kar
khulna ho to khul jaa.e barasna ho to barse
kya ishq hai kya shauq hai kya rashk hai kya laag
dil jalva-gah-e-naz men aage hai nazar se
is ḳhauf se mil lete hain vo ‘nuh’ se akasr
tufan na uTha.e kahin ye dida-e-tar se
Leave a Reply