afzal-naved

Ek Ujli Umang Udai Thi

ek ujli umang udaai thi

ham ne tum ne patang udaai thi

shaam barish men tere chehre se

abr ne qaus-e-rang udaai thi

main ne bachpan ki khushbu-e-nazuk

ek titli ke sang udaai thi

apni hi az-rah-e-tafannun-e-tabaa

dhajji-e-nam-o-nang adaai thi

khvab ne kis khumar ki khashak

darmiyan-e-palang udaai thi

koi bairuni aanch thi jis ne

andaruni tarang udaai thi

chhin kar ek dusre ki baqa

ham ne taz.hik-e-jang udaai thi

ehtimam-e-dhamal kho baitha

kis ne khak-e-malang udaai thi

mere charon taraf labon ki dhanak

us ne lagte hi ang udaai thi

ham ne puchha nahin hamari ana

kis se ho kar dabang udaai thi

phuljhadi thi ki tere kuche men

taan ga kar talang udaai thi

khud se tha bair paani men rah kar

ham ne mauj-e-nahang udaai thi

ek din ham ne haath phaila kar

chadar-e-pa-e-tang udaai thi

parkhache charon or bikhre the

ik badan ne surang udaai thi

phenk kar apne doston ki taraf

izz-o-jah-e-khadang udaai thi

zaiqa ja saka na munh se ‘naved’

daavat-e-shokh-o-shang udaai thi

More Poems

Leave a Comment