Bekal Utsahi
main jab bhi koi achhuta kalam likhta huun
to pahle ek ghazal tere naam likhta huun
badan ki aanch se sanvla ga.e hain pairahan
main phir bhi sub.h ke chehre pe shaam likhta huun
chale to TuTen chaTTanen ruke to aag lage
shamim-e-gul ko to nazuk-ḳhiram likhta huun
ghaTa.en jhuum ke barsin jhulas ga.i kheti
ye hadsa hai ba-sad-e-ehtiram likhta huun
zamin pyasi hai buḌha gagan bhi bhuka hai
main apne ahd ke qisse tamam likhta huun
chaman ko auron ne likkha hai mai-kada bar dosh
main phuul phuul ko atish-ba-jam likhta huun
na rabta na koi rabt hi raha ‘bekal’
us ajnabi ko magar main salam likhta huun
Leave a Reply