Ho Nahin Pai Hai Nuqsan Ki Talafi Ab Tak

Javed Jameel

ho nahin paa.i hai nuqsan ki talafi ab tak

bhuul paa.e nahin guzra hua maazi ab tak

bas ga.e shahr men fitrat nahin badli ab tak

aisa lagta hai ki insan hai vahshi ab tak

ab ye jaana bhi koi jaana hai jaane vaale

hai tire hone ki har ek nishani ab tak

aur ab kya use murda hi bana Daloge

kam vahi kya hai jo kuchh dil pe hai guzri ab tak

vaqt tha kaun sa lamha jo ḳhata kar baiTha

kyon ye jaari hai tabahi pe tabahi ab tak

tu ne manga hi nahin mangne valon ki tarah

varna rahti nahin ḳhali tiri jholi ab tak

ai qayamat tu abhi duur hi rahna kuchh roz

ham to chaḌh paa.e hain bas pahli hi siḌhi ab tak

teri mehnat men nahin koi kami ai ‘javed’

ho nahin paa.i hai allah ki marzi ab tak