Qamar Iqbal
hansti hui tanha vo dariche men khaḌi hai
laḌki hai ki tarshe hue hiron ki laḌi hai
sone ka ye andaz hai ḳhafgi ki alamat
chehra kiye divar ki janib vo paḌi hai
kohre men ghiri shaam ki Doli se utar kar
tanha.i ki chaukhaT pe tiri yaar khaḌi hai
dil umr ke qanun ka qaa.il nahin varna
ehsas use bhi hai ki vo mujh se baḌi hai
a.ankhon men tire gham ka hai hansta hua mausam
dil men tiri yadon ki hari fasl khaḌi hai
pabandi-e-auqat hui us se na hogi
har chand ki nazuk se kala.i men ghaḌi hai
maqtul ko kar aa.e jahan dafn ‘qamar’ log
talvar bhi qatil ki vahin par to gaḌi hai
Leave a Reply