tujhe bhi husn-e-mutlaq ka abhi didar ho jaa.e
mire mahbub ke jo ru-ba-ru ik baar ho jaa.e
sukun-o-chain mil jaa.e ḳhuda bhi yaar ho jaa.e
agar insan men insaniyat bedar ho jaa.e
lahu men garam-joshi rakh qalam men zor paida kar
nahin to har qadam par ik na.i divar ho jaa.e
qalandar huun mujhe shohrat ki chahat hi nahin varna
main rakh duun jis ke sar par haath vo sardar ho jaa.e
suna hai dard se ‘ahya’ qalam men zor milta hai
so main ne bhi dua kar li mujhe bhi pyaar ho jaa.e
Leave a Reply