Farasat Rizwi
falak pe chand hai aur paas ik sitara hai
ye teri meri mohabbat ka isti.ara hai
shab-o-sahar ke tasalsul men ye tulu-o-ghurub
samajhne valon ko ik dukh-bhara ishara hai
ye tere sozan-e-mizhgan ke bas ki baat nahin
yahan to pairahan-e-jan hi para-para hai
faqat karishma-e-tarz-e-nazar hai sud-o-ziyan
kisi ka naf.a kisi ke liye ḳhasara hai
vo jis ne mujh ko kahin ka nahin rakha ik umr
vahi ḳhayal vahi aarzu dobara hai
na.i jagah mujhe manus si lagi to khula
ye koi ḳhvab men dekha hua nazara hai
yahan se jo bhi gaya lauT kar nahin aaya
bata.e kaun kahan dusra kinara hai
Leave a Reply