rasm-o-rah-e-dahr kya josh-e-mohabbat bhi to ho
tuut jaati hai har ik zanjir vahshat bhi to ho
zindagi kya maut kya do karvaten hain ishq ki
sone vaale chaunk utthenge qayamat bhi to ho
”harche bada-bad” ke naaron se duniya kaanp uthi
ishq ke itna koi bargashta qismat bhi to ho
kar-zar-e-dahr men har kaif har masti baja
kuchh sharik-e-be-khudi rindana-e-jurat bhi to ho
kam nahin ahl-e-havas ki bhi khayal-araiyan
ye fana ki had se bhi badh jaaen himmat bhi to ho
kuchh isharat-e-nihan hon to nigah-e-naz ke
bhanp lenge ham ye mahfil rashk-e-khalvat bhi to ho
ab to kuchh ahl-e-raza bhi ho chale mayus se
har jafa-e-na-rava ki kuchh nihayat bhi to ho
har nafas se aae bu-e-atish-e-sayyal-e-ishq
aag vo dil men lahu men vo hararat bhi to ho
ye tire jalve ye chashm-e-shauq ki hairaniyan
barq-e-husn-e-yar nazzare ki fursat bhi to ho
gardish-e-dauran men ik din aa rahega hosh bhi
khatm ai chashm-e-siyah ye daur-e-ghaflat bhi to ho
har dil-afsurda se chingariyan ud jaengi
kuchh tiri maasum ankhon men shararat bhi to ho
ab vo itna bhi nahin begana-e-vajh-e-malal
pursish-e-gham us ko aati hai zarurat bhi to ho
ek si hain ab to husn-o-ishq ki majburiyan
ham hon ya tum ho vo ahd-e-ba-faraghat bhi to ho
dekh kar rang-e-mizaj-e-yar kya kahiye ‘firaq’
is men kuchh gunjaish-e-shukr-o-shikayat bhi to ho
Leave a Reply