poet

Dar Tak Ab Chhod Diya Ghar Se Nikal Kar Aana

dar tak ab chhod diya ghar se nikal kar aana

ya vo raton ko sada bhes badal kar aana

hamdamo ye koi rona hai ki tufan hai aah

dekhiyo chashm se dariya ka ubal kar aana

qasd jab jaane ka karta huun main us shokh ke paas

tegh-e-abru ye kahe hai ki sambhal kar aana

hasil us kuche men jaane se hamen hai aur kya

ulte ghar apne magar khaak men ral kar aana

vaan se avval dil-e-be-tab tu kab aata hai

aur aana bhi to sau ja pe machal kar aana

hamdamo meri sifarish ko to jaate ho vale

kahin vaan ja ke na kuchh aur khalal kar aana

Duube yuun bahr-e-mohabbat men ki ab jite-ji

apna dushvar hai uupar ko uchhal kar aana

ku-e-qatil men dam-e-naza koi le jaao

ja ke us ja hamen uqda hai ye hal kar aana

us ka be-vajh nahin hai ye chaman se bahar

gul mire samne hathon men masal kar aana

bazm-e-khuban men agarche koi parchae hazar

par tire paas hamen vaan se bhi tal kar aana

ji chala tan se mire jald ze-rah-e-ashfaq

ghar se do chaar qadam aise men chal kar aana

‘jurat’ us ki kahun kya tujh se tarah-dari main

jaana jab uth ke tab ik ruup badal kar aana

More Poems

Leave a Comment