Poet
jin men kuchh lutf aur andaz-e-karam bhi kuchh hain
tum hi insaf se kah do sitam bhi kuchh hain
naaz tum ko hai jafa par to vafa par ham ko
tum agar kuchh ho miri jaan to ham bhi kuchh hain
un ka ye qaul mire marne se kya hota hai
mujh ko da.ava hai mire dida-e-nam bhi kuchh hain
jis ko dekho hai vahi banda-e-be-dam un ka
ai ḳhuda teri ḳhuda.i men sanam bhi kuchh hain
hai abhi raah se guzra koi maana lekin
baat hi baat hai ya naqsh-e-qadam bhi kuchh hain
charḳh ke daur men yaksan nahin rahta koi
rahaten thiin jinhen kal tak unhen gham bhi kuchh hain
Turfa-tar hai tire maqtal ka tamasha qatil
kuchh taḌapte hain tah-e-tegh-e-do-dam bhi kuchh hain
ḳhana-e-dil men mire daulat-e-ulfat ke siva
dagh-ha-e-shab-e-furqat ke diram bhi kuchh hain
kuchh nahin kuchh nahin ai hazrat-e-‘sabir’ vo log
apne dil men jo samajhte hain ki ham bhi kuchh hain
Leave a Reply