hai qanun-e-fitrat koi kya karega
jo hota hai duniya men ho kar rahega
na neze pe jab tak tira sar chaḌhega
tire sar ko sar koi kaise kahega
main anjam-e-haq-goi se ba ḳhabar huun
pata hai ki ik din mira sar kaTega
vahi roTiyan jin se chhini ga.i hain
agar uTh khaḌe hon to kaisa rahega
tira husn hai shola-e-asmani
koi us se aḳhir kahan tak bachega
yaqinan kahin aaj bijli giregi
yaqinan koi ashiyana jalega
ye dard-e-mohabbat hai mere masiha
dava se na koi dua se ghaTega
mohabbat ki qismat men avargi hai
kahan tak koi us ke pichhe paḌega
‘vali’ jo hai na-ashna-e-mohabbat
mire dil ki dhaḌkan vo kyuun kar sunega
Leave a Reply