ye kaisi pyaas hai main jism ke sarab men huun
nikal ke ja.un kidhar kaise iztirab men huun
chaTan sar pe liye phir raha huun sadiyon se
janam janam se na jaane men kis azaab men huun
tu mujh ko bhulna chahe to bhuul sakta hai
main ek harf-e-tamanna tiri kitab men huun
main kya huun kaun huun kya chiiz mujh men muzmar hai
ka.i hijab uTha.e magar hijab men huun
bikhar hi ja.unga ik zarbat-e-sada to mile
main ek raqs-e-sharar sina-e-rabab men huun
Leave a Reply