phir andheri raah men koi diya mil ja.ega
tum akele ghar se niklo qafila mil ja.ega
tang-zarfi ḳhushk kar Dalegi dariya dekh le
ham ko kya koi samundar dusra mil ja.ega
kar raha huun main ta.aqub gardish-e-ayyam ka
ik na ik din zindagi tera pata mil ja.ega
andhiyo aa jaao khul kar main charagh-e-tur huun
mujh se Takrane ka tum ko bhi maza mil ja.ega
tang mat kar ai zamin kar den ishara ik agar
asmanon se bhi ham ko aasra mil ja.ega
sang-e-furqat maar kar mat jaao mujh ko chhoḌ kar
dil ka shisha toḌne se yaar kya mil ja.ega
sahilon par rahne vaalo ik zara avaz do
gharq hoti kashtiyon ko hausla mil ja.ega
Leave a Reply