Shaista Mufti
un se milne ka irada hai qaza se pahle
kyuun na dil khol ke ji luun main saza se pahle
is havale se hi shayad use pahchan sakun
ḳhud ko pahchan luun gar apne ḳhuda se pahle
zard mausam ki thi tamsil miri ankhon men
rang kuchh aur bhi guzre hain ḳhala se pahle
vaqt madum hai aur dahr ke andaz juda
kuchh bhi mumkin hai muqaddar men qaza se pahle
teri mahfil ki taraf lauT ke ja.un kaise
puchh to luun dil-e-ashufta-ada se pahle
kaise is ḳhvab ko TuuTa hua dekhegi sahar
shauq ke diip bujha duun main jafa se pahle
Leave a Reply