yaad rakhna ek din teri zaban tak a.unga
ḳhamushi ki qaid se harf-e-bayan tak a.unga
tu yaqin ke aa.ine men dekhna chahega aur
main faqat ḳhush-fahmi-e-hadd-e-guman tak a.unga
chhu ke tere zehn ke ḳhamosh taron ko kabhi
le ke ik tufan tire dil ke makan tak a.unga
phir tire ehsas ke sho.alon men Dhal ja.egi raat
main ubhar kar jis ghaḌi ashk-e-ravan tak a.unga
dastaras se tiir ban kar bhi nikal ja.unga phir
jab kabhi main tere abru ki kaman tak a.unga
sard aahon men simaT kar shiddat-e-ehsas se
qalb ki nazuk ragon ke darmiyan tak a.unga
itna mat socho ki ye nazuk ragen phaT ja.engi
main tumhare zehn men aḳhir kahan tak a.unga
Leave a Reply