Marghoob Ali
mil jaa.e kisi shaam kisi raat kisi din
vo mere tasavvur ki mulaqat kisi din
ahbab ne ik shaḳhs tarasha hai ajab sa
is ko bhi yahan la.enge ham saath kisi din
ḳhvabon ke bahut phuul mahakte hain labon par
ta.abir ki ho jaa.e koi baat kisi din
vo aankh jo sahra ki tarah hai yak-o-tanha
is raah men rakh do koi barsat kisi din
be-ḳhauf havaon ka abhi zor hai qaa.em
mausam ki tarah badlenge halat kisi din
Leave a Reply