din ki dahliz pe Thahre hue saa.e bhi ga.e
raat kya aa.i ki apne bhi para.e bhi ga.e
aks ta.abir ka ubhre ye tamanna hi rahi
a.ine ḳhvab ke ankhon ko dikha.e bhi ga.e
tohmat-e-ḳhosha-e-gandum hai abhi tak sar par
ham uchhale bhi ga.e ham ki gira.e bhi ga.e
shajar-e-dard ki kal bhi tha hara aaj bhi hai
vaqt ki dhuup men ham garche jala.e bhi ga.e
ham to un men hain jo rote hain to rote hi rahen
tum vo ḳhush-baḳht ki ro.e to hansa.e bhi ga.e
qissa-e-dard bahar-hal sunati hi rahi
garche divar pe sau rang chaḌha.e bhi ga.e
Leave a Reply