Hilal Fareed
thi ajab hi dastan jab tamam ho ga.i
ik misal ban ga.i ik payam ho ga.i
raat jab javan hui jab diyon ke sar uThe
tab hava bhi aur kuchh tez-gam ho ga.i
ek bas nazar paḌi us ke baad yuun hua
main ne jo ghazal likhi tere naam ho ga.i
miT rahi thi tishnagi baḌh rahi thi dosti
phir ana ki tegh kyuun be-niyam ho ga.i
falsafe ko chhoḌiye kya kahenge sochiye
zindagi jo aap se ham-kalam ho ga.i
tanz to bahut hue par ajiib baat hai
raah jo hamari thi rah-e-am ho ga.i
kaisi umda qaum thi kya hi zinda qaum thi
aḳhir us ko kya hua kyuun ghulam ho ga.i
jam-e-ishq pi chuke zindagi bhi ji chuke
ab ‘hilal’ ghar chalo ab to shaam ho ga.i
Leave a Reply