dil khoTa hai ham ko us se raz-e-ishq na kahna tha
ghar ka bhedi lanka Dhaa.e itna samjhe rahna tha
kyuun hanste ho main jo barahna aaj junun ke hathon huun
kuchh din guzre main ne bhi bhi rang libas ik pahna tha
naza.a ke vaqt aa.e ho tum ab puchh rahe ho kya mujh se
halat meri sab kah guzri jo kuchh tum se kahna tha
aa ke gaya vo roya kiin ye harj hua nazzare men
ankhen kuchh nasur nahin thiin jin ko har dam bahna tha
himmat haare ji de baiThe sab lazzat khoi ai ‘shauq’
marne ki jaldi hi kya thi ishq ka gham kuchh sahna tha
Leave a Reply