Ek Subh-E-Arzi Thi Ki Pal Mein Guzar Gai

Poet

ik sub.h-e-arzi thi ki pal men guzar ga.i

ik sham-e-mustaqil thi ki zalim Thahar ga.i

jalve ke izhdiham men kuchh sujhta nahin

nazzare ki havas men mata.a-e-nazar ga.i

yaaro ye kis nava-e-mohabbat ki guunj thi

dekho to saari bazm ko divana kar ga.i

un ki to ik ada-e-taghaful ki baat thi

mere to ḳhvab-e-shauq ki duniya bikhar ga.i

simTi to ek goshe men pinhan thi vo nigah

chhalki to ka.enat ko sairab kar ga.i

avargi-e-shauq men guzregi ab kahan

ik shab to mai-kade ki faza men guzar ga.i

jalti hai sar-barahna kaḌi dhuup men hayat

vo chhanv ahd-e-rafta ki aḳhir kidhar ga.i

marne lage ho shoḳh nazaron pe aj-kal

sanjidgi mizaj ki ‘nazim’ kidhar ga.i