zikr-e-ifa kuchh nahin va.ada hi va.ada ham se hai
raat din shaam o sahar imroz farda ham se hai
ham na kahte the ki ye jaur-o-jafa achchhi nahin
puchh kuchh roz-e-jaza ab tum se hai ya ham se hai
dusron ke kahne sunne par na tum jaao na ham
tum se bas kahna hamara hai tumhara ham se hai
sharm-e-vasl-e-ghair se uThti nahin unchi nazar
dard-e-sar kaisa ye sab hila-bahana ham se hai
kaun si ḳhubi hai ham men jis par nazan hon ‘nasim’
jo zamane se bura hai vo bhi achchha ham se hai
Leave a Reply