ai husn-e-lāla-fām! zarā aañkh to milā
ḳhālī paḌe haiñ jaam! zarā aañkh to milā
kahte haiñ aañkh aañkh se milnā hai bandagī
duniyā ke chhoḌ kaam! zarā aañkh to milā
kyā vo na aaj ā.eñge tāroñ ke saath saath
tanhā.iyoñ kī shām! zarā aañkh to milā
ye jaam ye subū ye tasavvur kī chāñdnī
saaqī kahāñ mudām! zarā aañkh to milā
saaqī mujhe bhī chāhiye ik jām-e-ārzū
kitne lageñge daam! zarā aañkh to milā
pāmāl ho na jaa.e sitāroñ kī aabrū
ai mere ḳhush-ḳhirām! zarā aañkh to milā
haiñ rāh-e-kahkashāñ meñ azal se khaḌe hue
‘sāġhar’ tire ġhulām! zarā aañkh to milā