Peer Akram
sisak rahi hai andheron men sham-e-tanha.i
koi charagh jalao ba-nam-e-tanha.i
sada rahe yunhi abad shahr-e-shishagaran
ki mere naam kiya vaqf jam-e-tanha.i
ravish ravish jo hain TuuTe hue kuchh a.ine
qadam qadam hai nishan-e-ḳhiram-e-tanha.i
ye kis ḳhayal se raushan hai ru-e-sham-e-firaq
ye kaisi lau se damakta hai bam-e-tanha.i
saja.i honTon pe divar-o-dar ki ḳhamoshi
kuchh is tarah bhi kiya ehtimam-e-tanha.i
likhi hain palkon se be-harf bhi munajaten
kalam-e-fan se kiya ehtiram-e-tanha.i
chamakte dard se ‘akram’ sahifa-e-dil par
ubhar raha hai musalsal kalam-e-tanha.i
Leave a Reply