ye achchha hai ki ye achchha nahin hai
jo us se ab koi rishta nahin hai
vo hai vaisa ki ab vaisa nahin hai
use ik umr se dekha nahin hai
riha ho kar qafas se kya karega
parinde ne kabhi socha nahin hai
na puchho vaqt ki raftar ham se
guzarta hai magar dikhta nahin hai
mujhe maqtal men roka hai ye kah kar
tumhen ab jaan ka ḳhatra nahin hai
sabhi jannat men jaana chahte hain
ye dozaḳh ke liye achchha nahin hai
ḳhushi kyuun phir rahi hai munh phula.e
mira us se koi jhagḌa nahin hai
use patthar ke ho jaane ka Dar tha
palaT ke is liye dekha nahin hai
ye ku-e-ishq hai is men se ‘asif’
nikalne ka koi rasta nahin hai
Leave a Reply