Bataur-E-Yaadgar-E-Zohd Mai-KHane Mein Rakh Dena

Nooh Narvi

bataur-e-yadgar-e-zohd mai-ḳhane men rakh dena

miri TuuTi hui tauba ko paimane men rakh dena

kaha tha ai dil-e-na-faham-o-nadan tujh se ye kis ne

ḳhuda-ḳhane ki hurmat ko sanam-ḳhane men rakh dena

pasand aa.e na aa.e munhasir hai ye tabi.at par

kisi ke samne dil ham ko nazrane men rakh dena

dobara phir kisi din mere kaam aa.egi ai saaqi

jo mai piine se bach jaa.e vo paimane men rakh dena

kahin aa.en kahin jaa.en kahin uTThen kahin baiThen

qadam hir-phir kar apna ham ko but-ḳhane men rakh dena

charagh-e-anjuman apni ziya phailane vaala hai

uTha kar sho.ala-e-ulfat ko parvane men rakh dena

kahan ham DhunDte tujh ko phirenge us ghaḌi saaqi

subuhi ke liye thoḌi si paimane men rakh dena

nazar aate hain kuchh angur mujh ko ai mire saaqi

lahu tauba ka un ke ek ik daane men rakh dena

ḳhata-e-ishq par kyuun ‘nuh’ apni jaan kho baiThe

raqam itni baḌi aur is ko jurmane men rakh dena