bana ke a.ina-e-tasavvur jahan dil-e-dagh-dar dekha
firaq men lutf-e-vasl paaya ḳhizan men rang-e-bahar dekha
tamam kamon ka raste par hamesha dar-o-madar dekha
fasad tinat men jin ki paaya har ek sohbat men ḳhaar dekha
sambhala jis din se hosh ham ne vatan ko kul chand baar dekha
na ki azizon ki gham-gusari na phir ke apna dayar dekha
hue jo manus kaj-ravi se phire rah-e-sidq-o-rasti se
na baiThe ik roz vo ḳhushi se na kuchh ba-juz intishar dekha
bisat-e-aish-o-tarab hai barham ye hai nasheb-o-faraz-e-alam
piyada hain un ko dekhte ham jinhen hamesha savar dekha
paḌi hai pichhe kuchh aisi shamat miTa rahe hain nishan-e-sarvat
bahut azizon ko bahr-e-shohrat ganvate apna vaqar dekha
jama tha jis vaqt rang-e-sohbat tha nek-o-bad men bhi lutf-e-ḳhullat
magar ḳhizan aa.i ya qayamat na phuul dekha na ḳhaar dekha
dil-o-jigar ko hua gavara kahan surur-e-sharab-e-hasti
mila kabhi iztirar men ye kabhi use be-qarar dekha
gaya vo daur-e-siyah-masti raha faqat nam-e-mai-parasti
jo zo.af-e-piri men aankh kholi to kuchh tabi.at pe baar dekha
‘habib’ ham ham-safir-e-bulbul hamesha the gulshan-e-jahan men
vafa ki ḳhu bu ho jis men vo gul nazar na aaya hazar dekha
Leave a Reply