Daman-E-Sad-Chaak Ko Ek Bar Si Leta Hun Main

Rajendra Nath Rahbar

daman-e-sad-chak ko ik baar si leta huun main

tum agar kahte ho to kuchh roz ji leta huun main

be-sabab piina miri adat men shamil nahin

mast ankhon ka ishara ho to pi leta huun main

gesuon ka ho ghana saaya ki shiddat dhuup ki

vo mujhe jis rang men rakhta hai ji leta huun main

aate aate aa ga.e andaz jiine ke mujhe

ab to ‘rahbar’ ḳhuun ke aansu bhi pi leta huun main