jada-e-shauq men kaam aa.e sikandar kitne
is samundar men hue gharq shanavar kitne
un ko dekha to na tha naam suna jab un ka
zehn men bante rahe husn ke paikar kitne
mor-e-be-maya magar apni ada par qaa.em
ham se Takrate rahe vaqt ke davar kitne
kitne zarrat ko mahtab ki zau baḳhshi hai
aap ke saath hain vabasta muqaddar kitne
baat mai-ḳhane ke adab se aage na ga.i
ru-ba-ru mere chhalakte rahe saghar kitne
shahr-dar-shahr isi baat ka charcha hai bahut
phuul si baat pe maare ga.e patthar kitne
kahin apnon ki inayat kahin ghairon ka karam
muskurate hain mujhe dekh ke ḳhanjar kitne
ye bhi a.ina-e-ayyam men dekhoge bahut
kha ga.i mauj-e-sitam jaane sitamgar kitne
har qadam luTte rahe itna bata de koi
qafile valon ki qismat men hain rahbar kitne
haa.e vo pursish-e-halat ka andaz ‘qamar’
meri ankhon men simaT aa.e hain manzar kitne
Leave a Reply