kabhi ziyada kabhi kam raha hai ankhon men
ik intizar ka mausam raha hai ankhon men
kabhi hai ḳhushk kabhi nam raha hai ankhon men
Thahar Thahar ke ye zamzam raha hai ankhon men
basa hua hai tasavvur men ik hasin paikar
koi ḳhayal mujassam raha hai ankhon men
nazar ke samne aa.i hain kitni tasviren
usi ka aks magar ram raha hai ankhon men
vo qurbaton ka tasavvur vo lams ka jaadu
sada-bahar ye mausam raha hai ankhon men
ulajh ke rah ga.e nindon ke ḳhvab palkon par
koi ḳhayal yuun paiham raha hai ankhon men
lab-e-ḳhamosh pe ‘mina’ hai nauha-e-hijran
darun-e-zat ye matam raha hai ankhon men
Leave a Reply