ḳhud apne jurm ka mujrim ko e’tiraf na tha
magar ye jazba ba-nam-e-junun muaaf na tha
pighal to sakta hai loha nigah-e-azm to ho
ye pahle qaid ki divar men shigaf na tha
hasad ki gard thiin bughz aur nafrat ki
mire vajud pe aisa koi ghilaf na tha
ulajh rahe hain bahut log meri shohrat se
kisi ko yuun to koi mujh se iḳhtilaf na tha
tire jamal se mahfil men ab sukun sa hai
vagarna zehn kisi ka kisi se saaf na tha
mira nasib ki kashti kinare lag na saki
hava ka jhonka to vaise mire ḳhilaf na tha
jadid lahja ye andaz kis liye ‘bekal’
tujhe to husn-e-rivayat se inhiraf na tha
Leave a Reply