poet

Nigahon Mein Iqrar Sare Hue Hain

nigahon men iqrar saare hue hain

ham un ke hue vo hamare hue hain

jin aankhon men aansu chakare hue hain

ham un ki nigahon ke maare hue hain

na khatken kaho kis tarah tir-e-mizhgan

jigar par hamare utare hue hain

jhade jo tiri kafsh-e-zarrin ke zarre

falak par vo ja kar sayyare hue hain

abas jaan deti hai bulbul gulon par

ye us rukh ke sadqe utare hue hain

kis andaz se band-e-mahram kase hain

ki joban ko un ke ubhare hue hain

yaqin hai bala ho koi aaj nazil

vo balon ko apne sanvare hue hain

khabar-dar hathon se jaane na paaen

ye duzd-e-hina maal maare hue hain

kahe deti hain saaf ankhen tumhari

kisi ghair se kuchh ishare hue hain

main manjdhar men Dubta huun ilahi

vo dil le ke mera kinare hue hain

hamesha jo bharte the dam dosti ka

vahi dushman-e-jan hamare hue hain

nazar kar dua par khudavand-e-alam

ki ham haath apne pasare hue hain

bhala ghair ki is men hai kya shikayat

vahi dushman-e-jan hamare hue hain

unhen ham ne nahla diya de ke chhinten

ajab lutf dariya kinare hue hain

khabar amad-e-gul ki shayad hai ‘agha’

chaman saare jhade bahare hue hain

More Poems

Leave a Comment